B•R•A•S•I•L•I•E

25. Dezember 2015 - 22. Januar 2016

São Paulo // Santana


Brasilie het uns mit 33 Grad und eme riese Gwitter empfange! 
Dr 1. Restuarant-Bsuech: Was für e Abentüür. Mir hend nämli kei Ahnig ka, was mr bstellt hend. Hend eifach mol öpis günstigs gno. S het sich als Salat mit Tomate und viel Zwiebele und denn Fleisch mit Pommes Frites, Riis und Bohne usegstellt. Lecker Schmecker! 

Rio de Janeiro // Santa Teresa


Villa Laurinda! Danke Ramona & Nils ❤️



Corcovado

Also dä Corcovado - d Christus-Statue - das isch jo scho e Abentüür gsi. 
Zum Glück hets Schilder ka, denn dr Taxifahrer het kei Ahnig gha, wo er muess dure fahre. Endlich acho, hämmer zerst emol 2 Stund indr brühtende Hitz müesse astoh für d Billet - ohni genau z wüsse, für was die Billet sind: Transport? Ihtritt? Beides? D Priise hend au nit mit dene usem Internet überii gstumme... 
Mit dene Tickets hätt denn aber s Astoh erst richtig agfange: für so Minibüs, wo eim die letzte 2.5 km ufe fahre. Gschätzi Wartezyt: 3 Stund! Wo me genau muess astoh, het irgendwie keine gwüsst und s isch e rechts Durenand gsi. 
Hämmer uns nit welle atue & sind ufe gloffe. Obe simmer - anderst als d Bus-Lüüt, wo nämli nomol hend miesse astoh/: ei Mol zum ihne cho, und denn no e zweits Mol, zum wieder in Rückreise-Bus z cho! UNGLAUBLICH - zimmli schnell ihne cho & hend uns dä Christus chönne aluege. D Ussicht isch traumhaft - leider hets Wätter nit so mitgpsielt.
Es isch eifach nur chaotisch gsi und mir hend uns scho chli gwunderet, dass sone riese Touristeattraktion do nit e chli e bessers System het.
Aber so lauft das do glaub eifach und an das müend mir (also vorallem d Nadja) sich no recht gwöhne! 

Praia do Ipanema/Copacabana


Silvester. Dr 1. Churrascaria-Bsuech : DANKE PAPI! 

Lapa


Lustige Leute - unsere erste Ihdruck

1. Bus-Billet-Verkäuferin im Bus schlooft tief und fest, wacht kurz uf, zum e Billet z verkaufe und pfuust denn witter (inkl. Gesabbere!) 

2. e Frau lauft mit ihrer Schildkrot unterem Arm durch d Stadt.

3. d Noochbere vom AirBnB chömme kurz verbi, zum säge, dass s Znacht jetzt parat isch, als wär s selbstverständlichste uf dr Welt, dass mir mit ihne mit ässe. 

4. s zeige sich alli gern sehr freizüügig, egal was sie füre Figur hend.

5. Brasilianischi Männer cha me in zwei Gruppe unterteile: Die, wo am Obe Bierli trinke, und die, wo am Obe bi 34 Grad e paar Rundene gönd go jogge! 


Ubatuba


Alle guten Dinge sind 3 ...

1. E 5-stündigi Busfahrt wird e 12-stündigi Busfahrt

2. e völlig durchnässte Tramper

3. e Tuusigfüessler, wo dr Nadja mite indr Nacht ins Ohr krabblet

Reif für die Insel // Ilha de Santa Catarina


Für 10 Täg händ mir e chlini Wohnig in Barra da Lagoa gmietet: s isch nigelnagelneu, s Holz vo de Fensterläde und Türe isch nonig lackiert, was drzue führt, dass es immer nach Pferdestall schmeckt. S isch minimal ihgrichtet, aber s losst sich guet läbe! 
Zwei tolli Stränd sind in 30 Minute z Fuess erreichbar und mit em Bus chunnt me guet uf dr ganze Insle ume. 

Barra da Lagoa


Pântano do Sul


Lagoinha do Leste


Ilha do Antahomirim


Lagoa di Conceição


Busfahre in Brasilie

Als Usgliich zu de viele Staus, mache d Busfahrer do gern s Holperschwelle-Spiel: es gwinnt dä Busfahrer, vo zwüsche zwei Holperschwelle (die hets in jedem Dorf all 400m) am höchste cha beschleunige, so dass es grad no mit ere Vollbrämsi längt, zum einigermasse sicher über d Holperschwelle z cho. 
Ame klappt das mit em Brämse nit, denn wirde me e halbe Meter hoch usem Sitz gworfe - fast wie ufem Free-Fall andr Basler Herbstmäss! 
 


Iguaçu Wasserfäll (Brasilianischi Sitte)




Parque des Aves


Iguazú Wasserfäll (Argentinischi Sitte)

Wiedersehen macht Freude: per Zuefall simmer genau glichzytig in Puerto Iguazú gsi!


Brasilie in Zahle

400ml Sunnecrème und 200ml Après-Soleil brucht
243 Fötteli vo de Wasserfäll gmacht (drvo 221 wieder glöscht - und das nur mit de Nikon) 
173 alti VW-Käfer gseh
56 mol vo Mugge gstoche worde und 1/2 Fläschi Parapic brucht
50 Stund Bus gfahre
29 Wörter uf portugisisch glernt
7 mol go Surfe
4 mol richtig fein gässe
3 Mol ame Verkehrsunfall verbi gfahre
2 Mol e Tuusigfüessler im Bett ka
2 mol e Bootsusflug gmacht
2 mol inere Chruasscaria gässe
1 mol go Wandere
1 gführti Tour gmacht (Mountainbike, Bootsfahrt, Kajakfahrt, Spaziere / Krokodil, giftigi Schlange & e grossi Eidechse gseh) 
1 mol panierts Rindfleisch gässe (wie chunnt me nur uf die Idee??)
1 neus Bikini & e Badhose kauft (derfür e kurzi Hose verlore)