CALIFORNIA DREAMING

Walmart & Casinos

Bi Regewätter heissts für uns: km um km fahre und ab in Süde. Am Highway 101 vo Washington nach Oregon nach Kalifornie hets zwar vieli zum Teil direkt am Meer glägeni State Parks (mit Campgrounds), aber Geld fürs Übernachte usgeh, wenn me wegem Rege nüt drvo het..??

Darum stönd bi uns d Walmart Parkplätz und neuerdings d Kasinos hoch im Kurs.

Im Kasino hend mr sogar je 10 Dollar Startguethabe kriegt, wo mir verspielt hend. Dr Björn het 68 Cent gwunne, d Nadja het e guets Händli zeigt (dank dr Hilf vom Björn) und het sogar 41 Dollar gwunne!

Am Morge gits no gratis Kaffii: Jackpot!

Jetzt simmer ready für Las Vegas!

Avenue of the Giants

Sausalito

Half Moon Bay

Menlo Park // Stanford // Palo Alto

S•A•N ... F•R•A•N•C•I•S•C•O

R O A D - T R I P

Highway 1 // LA // Joshua Tree // Grand Canyon // Las Vegas // Valley of Fire // Death Valley // Yosemite

Highway 1

Santa Cruz

Monterey

Big Sur

Die berühmti Küstestroos isch wirklich e Traum. Hend sogar ime National Forest indr Nöchi vom Big Sur mit traumhafter Ussichte chömme übernachte.

Solvang

Santa Barbara

Jackpot!

Sunntig, 29. November 2015, 10:45 Uhr.

Casino Nr. 4. Memberkarte gmacht. 10 US-Dollar Startguethabe gschänkt kriegt. Ame eiarmige Bandit gspielt. 770 US-Dollar gwunne. Brielt vor Freud. S ganze Geld bim Roulette uf schwarz gsetzt. Alles verlore.

Nei, nei - Scherz. S ganze Geld uszahle loh.

Fazit: 100 Dollar Startguethabe gschänkt becho // 843 Dollar gwunne.

Joshua Tree National Park

Dr Joshua Tree National Park het d Nadja zwar ufeme Roadtrip im 2011 mit ihrer Familie scho mol durchfahre, aber me muess en eifach gseh ha. Mir hend vieli chliini Spaziergäng und e tolli 5stündigi Wanderig ufe Eureka Peak gmacht und sind usem Stuune nüm use cho: Steiformatione, Wüsti, Yukkas und Joshua Trees.

Route 66

Supai // Canyons, Wasserfäll und es Indianerdorf

Zimlich spontan hend mir uns entschiede, e Wanderig ins Dorf Supai ime Indianer-Reservat im Grand Canyon, Arizona, z unterneh. Mir hätte gern zältlet, aber ohni Zelt und bi -8 Grad Celsius indr Nacht wärs denn doch e bitz früsch worde. Also hämmer e Zimmer im einzige Motel reserviert und sind zum Hualapai Hilltop, 200km vo Kingman, gfahre.

Ab dört chunnt me nur no z Fuess witter. Alternativ chönnt me für 100 Dollar ufeme Muli ritte oder sich für 90 Dollar mit em Helikopter ihfliege loh.

Die 13km langi Wanderig durch dr Haulapai Canyon bis ins Dorf Supai isch eifach traumhaft.

Nach dreiehalb Stund simmer im Motel acho, hend s Zimmer bezoge und hend uns ufe Weg zu de erste zwei vo insgesamt vier Wasserfäll gmacht: Navajo Falls und Havasu Falls.

Nach insgesamt 19km hämmer uns am Obe riesig über e heissi Duschi und e feins Znacht (Gschwellti und selber backts Brot mit Ufstrich und Schinke) gfreut.

Am 9ni am Morge sind mr denn ufbroche, denn mir hend natürlich au no die andere zwei Wasserfäll welle gseh. Die 8km sind e rechti Herusforderig gsi:

Zu de Mooney Falls het me durch dr Canyon miesse kraxxle und übere Klättersteeg abeklättere: ungsicheret und recht rutschig, es isch dr gföhrlichsti Abschnitt gsi. Es het sich aber glohnt!

Zu de Beaver Falls hend mr drei Mol dr Bach miesse überquere. S chalte Wasser isch zum Teil chnüü-hoch gsi und d Nadja het das nit nume lustig gfunde. Nach dene letzte drei Kilometer, wo me ufgrubd vom Gländ nume sehr langsam vorah cho sind, hend mrs denn aber glich no gschafft:

Am 14:00 Uhr simmer wieder zrugg im Dorf gsi und hend uns denn zügig ufe Weg zrugg zum Auto gmacht, schliesslich sind uns nach bereits 16 gwanderete KM no witteri 13 bevor gstande und am 18:00 isch es do scho dunkel.

E wunderbaar kitschige Sunneuntergang het uns uf de letzte Kilometer begleitet und mir hends mit dr letzte Sunnestrahle und de letzte Kräft grad no usem Canyon und zrugg zum Charlie gschafft.

Definitiv e witters Highlight uf unserer Reis! Es isch eine vo de schönste Ort, wo mir je gseh hend und dr Muskelkater, d Blootere an de Fiess und d Köste (Hotel, Unweltgebühr und Ihtrittsgeld: 242 Dollar) uf jede Fall wert!

E chleine Wehmuetstropfe...

Was uns trotzdem sehr schockiert und beschäftigt het, isch s Indianerdorf Supai gsi: d Bewohner sind alli sehr unfründlich und unsympathisch gsi. Me het sich gar nit willkomme gfühlt und me isch komisch agluegt worde. D Gärte sind alli mit Stacheldroot umzüünt und völlig zuegmüllt gsi. D Pferd sind im eigene Dreck gstande, s het PET-Fäsche, Dose und andere Müll überall umeligge ka und d Züühn und Droht isch eifach umeglääge - so dass sich Tier und Kinder eifach dra verletzte hätte chönne.

E Naturvolk, wo im Ihklang mit de Natur lebt?? Das isch bim beste Wille nit z erkenne gsi. Fast alli sind übergwichtig gsi, mit ihrne chline Benzin-Wägeli umegfahre und hend bim Ritte s Smartphone indr Hand ka und Kopfhörer in de Ohre ka...