14. September 2015

News usem Norde

Soo, es wird Zyt füres Update us Kanada. Dä Blogihtrag dräiht sich um Sache,wo mir vermisse, mir stelle euch unsere Campervan vor und brichte über Ihsichte, Highlights und Travel Essentials!

Dr negst Ihtrag wird zu unserer Route si und hoffentli au meh Fötteli liefere! Viel Spass bim Läse! Liebi Grüess usem Yukon.

xxx N+B

¥ WAS MIR VERMISSE WERDE

Ganz am Afang vo unserer Reis sind mir mol druf z spreche cho, was uns wohl am meiste wird fehle während däm Johr ( Mensche usgnoh // aber Jan, mir vermisse di gaaaaanz fest!!!). Bi Wiehnachte sind mr uns einig gsi. Denn isch no d Herbstmäss, Fasnacht und die gmietliche Öbe am Rhy drzue cho.

Mittlerwiile hani aber gmerkt, dass i do in Kanada au e chli Herbstmäss ha: brennti Mandle (brennti Haselnüss), Achtibahn-Kribble-im-Buch-Gfühl uf de Highways und de Griffle Roads, wo mr jewiils fahre, zum zu de Übernachtigsplätz z cho, und mis geliebte Thai-Ässe vom Petersplatz chochi uns eifach selber!

¥ DR CHARLIE

S wird Zyt, dass mir unsere Charlie - wo mir scho sehr ins Herz gschlosse hend - e chli genauer vorstelle:

Er isch e 1990er Chevy Get Away Campervan mit zwei Sitzplätz. Hinte folgt e bitz Stauruhm, denn e Kästli für s Ässe und s Gschirr (wo zum Glück scho alles drbi gsi isch) und uf dr rechte Sitte i Kästli für d Kleider, zwei Gas-Herplatte, und e chliises Brünneli. Dr hintersti Tei vo unsere 2-Zimmer-Wohnig isch unsers 1.80m lange Bett (dr Björn isch 1.83m) / unseri Sitzecke mit Tisch.

Mir hend uns sehr ans Lebe im und ums Auti gwöhnt. Dr Kopf schlönd mr nur no selte meh a, au wenn leider kei Wunder gscheh isch: Mir könne beidi nit ufrecht stoh dinne.. Dr Björn het no 20 Högge montiert und Spannseil zooge, damit mir Sache chönne ufhängge, recht praktisch.

Dr Kühlschrank funktioniert leider nit, aber bi 7 Grad Innetemperatur am 8ti am Morge isch sowieso s ganze Auti e wandelnde Kühlschrank!

Dr Charlie het bis jetzt nur zwei Mol -aber defür jewiils in de ungünstigste Moment (z Oberst ufeme Gletscher) - gstreikt, ansunste sind mr sehr zfriede mit unserem Chauf.

Im Moment gsehts au so us, als würde mr d Westküste vo dr USA no mit ihm mache und ihn denn in Mexiko verkaufe.

¥ IHSICHTE

• Abwäsche lossts sich au mit Kuchipapier. Usserdem isch dr 8-Dollar-Duschsack au e super Abwäschhilf.

• Täglichs Dusche wird ebefalls überbewertet. All 5 Täg längt :-)

• Kanadier/inne sind alli super fründlich, und nit ganz eso oberflächlich wie d Amis.. (Me cha super e paar Bierli mit ene trinke)

• Kanadier/inne wo campe, sind durchschnittlich 75 Johr alt! Ok, velicht chli übertriiebe, aber mir hend wirkli scho Lüt atroffe, wo nöcher bi 100 als bi 50 Johr sind und chum me hend chönne laufe, aber bi 5 Grad no zeltlet hend und uf jegliche Luxus verzichte. Hut ab.

• Kanadischi Füchs und Bäre chönne sehr fotogen si

• Fische wär sehr entspannend - wenn do nit die Chnüppel indr Schnur wäre...

• Härdöpfelstock-Flöggli eigne sich nit nur zum Härdöpfelstock mache, sondern au zum Fisch paniere

• meistens wüsse mir nit, was füre Wuchetaag, geschweige denn, was füre Datum mir hend - drfür chönne mr dr Wechsel vo de Johreszyte an de gelb-orange Blätter wunderbar miterlebe. Dass dr Herbst nööcher ruckt, gseht me au an de vielne Wohnmobil, wo uns entgege chömme und ufem Weg in Süde sind. Usserdem werde mir nüm überholt, wenn mir mit gmietliche 80km/h uf de Highways Richtig Norde tuckere und Ussicht nach Bäre und Karibous halte.

• SOCKE: sogar uf 9 Quadratmeter Lebensruum und mit nume 15 mitbrochte Soggepääärli, isch es möglich, nach 6 Wuche nume no 13 kompletti Soggepäärli z ha // UNGLAUBLICH...

¥ HIGHLIGHTS

•~• die ganzi Reis •~•

Mir sind unglaublich glücklich und fühle uns privilegiert, dass mir die Reis zämä in Agriff hend dörfe neh. Die letzte drei Johr hend mir unzähligi Stunde umgeh vo thailändischem Ässe, Chääs und Kinder (Nadja) beziehigswiis phychisch kranke Mensche oder Jugendliche (Björn) verbrocht, zum Geld uf d Sitte z lege, hend plant und vorbereitet, damits mir jetzt in volle Züg chönne gniesse.

•~• Nordliechter •~•

Mir hend se scho 5 Mol dörfe bewundere und s isch eifach einzigartig und wunderschön, wenn me se so am Himmel gseht tanze!

•~• d Natur •~•

Kanada isch eifach wuuunderschön! D See, d Berge, d Campingplätz indr Natur, wo nume s nötigste hend: E Füürstell (im Yukon sogar gratis Füürholzruugeli), es "Outhouse" - sone WC-Schüssle-Plumpsklo und e Tisch. Ebefalls inklusive sind jewiils wunderschöni Ussichte ufe See/Fluss und ind Berge!

Eifach e Traum - sogar s Autifahre isch entspannend und mir gniesse d Landschafte

•~• d Tier •~•

Es isch jedes Mol ufs neue wieder faszinierend, Bäre am Strosserand z gseh. Ei Mol hend mr e Mama-Schwarzbäär mit ihrem Babybär ganz lang chönne beobachte. Dr Björn het einmol au e halb Stund e Bär ame Hang chönne beibachte, während ich e Date mit minere Migräne und em Bett ka ha. Me muess halt Prioritäte setzte...

In Hyder, Alaska, hend mr vo sonere Touristebrugg us chönne Grizzlies bim Lachsfische beobachte. Das sind richtigi Fätze gsi, so eim wänd mr indr freie Natur definitiv nit z nooch cho!

Mir hend aber au scho Haase, Eichhörnli, Streifehörnli, Frösch, Vögel, Stacheltier (mir sind immer noni ganz sicher, was es gsi isch) und sogar zwei Füchs chönnne beobachte. Dr Eint hätte mr fast überfahre, aber dr ander het sich bim Charlie ganz schön wohl gfühlt. Dr Björn het bim Fische au scho e Otter gseh.

•~• dr King Salmon und e paar Gedanke zum Fisch/-Fleischkonsum•~•

E Highlight isch es füre Björn definitiv gsi, für d Nadja eher e Albtraum.. (Und glaub nüt für alli Vegis & Veganer - sorry!)

Es isch öpe in unserer 3. Wuche gsi und me muess drzue no säge, dass dr Björn scho e paar Fisch gfange, tötet und usgno het. Sobald dr Kopf weg gsi isch, het sich denn au d Nadja wieder blicke loh. Mir sind also ame tolle Campingplatz und dr Björn het am Obe vorher scho e Chinook Salmon (ca 70cm) gfischt. Am däm besagte Tag het sich d Nadja uns Zmittag kümmeret und dr Björn isch abe an Fluss go fische. Irgendwenn het er denn ufegruefe: "Schatz, i glaub i ha ne chli ne z grosse Fisch gfange!"

D Nadja hets nit recht verstande und isch dr Weg abe an Fluss gloffe und isch fast in Ohnmacht gfalle:

Liegt doch dört tatsächlich e 1.25 Meter lange, 30kg schwere Lachs!!

Er isch pechschwarz und knallrot gsi und het d Nadja mit offenem Muul agstarrt. Dr Björn het e letzte Rettigsversuech für sis Fischernetzt unterno, das isch aber scho weg gsi. Nochdem denn dr ersti Schock überwinde gsi isch und keini Träne meh gflosse sind, het dr Björn dr Fisch usgno und filetiert. D Nadja het sie erste paar vo dene 14 Filets denn indr Pfanne kocht und dr Rest hend mr mit Ei und Härdöpfelstock-Flogge paniert und abröötlet. S isch wirklich sehr fein gsi! D Nadja isch aber au nit truurig, wenns witterhin eifach Hecht, Forelle oder Esche git!

Früsch und selber gfange - öpis ganz anders, als indr Migros e importierte Thunfisch oder e Lachs z kaufe. D Natur do het so viel z biete und mir sind sehr dankbar, dass mir uns dörfe "bediene" - natürli nur so viel, wie dass mr wirkli möge ässe und moralisch vertrete..

Fleisch kaufe mr sehr selte, einersiits, wells vo dr Qualität nie ans schwyzer Fleisch ahne chunnt, wells tür isch, wells eifach miehsam isch, die fettige Täller und Pfanne z wäsche und will mir oft früsche, selber gfangene Fisch hend!

Indr Schwyz isch es selbstverständlich, mehrmols indr Wuche Fleisch oder Fisch ufem Tisch z ha. Muess me sich aber selber ums Fange, Töte und Usneh kümmere, schätzt mes viel meh!

¥ TRAVEL ESSENTIALS : was mir nit bereut hend, mitgno z ha:

# eReader mit viiiiielne Büecher druf, do mr in some Johr au viel Zyt zum läse het (zuesätzlich bo Büecher ufem Iphone, do me zu Zweit nit guet läse cha). Mir hend e Tolino & sind meeega zfriede! D Akku hebt au bi täglichem Läse fast 2 Wuche.

# Kleider us Merino-Wulle: relativ tüür, zum Teil nit so chic, aber unglaublich praktisch!! Me cha se guet 3-5 Täg traage, ohni dass sie stingge.

# Seifi usem Lush: dört gits Hoor-Shampoo (Seifibarre), wo chli und ergiebig isch. Mir benutzes sogar füre Körper und hend s Zimt- und s Honig-Shampoo.

# Fischerruete: d Investition lohnt sich, do me drnoch zu vielne Gratis-Mohlzyte chunnt!

# Hörbüecher: Wenn me mol nüm mag rede (das chunnt nämli sogar bi de Nadja vor)..