FOTOS III

     23.o9.2o15

Mir sind in Haines, Alaska. Mir hend uns sage loh, dass es bim Chilkoot Lake, wo au unsere Campground isch, ganz vieli Lachs heig, wo im Spootsummer chäme cho leiche & dass me dört guet chönn d Grizzlies beobachte. Am Afang hämmer tuusigi vo Seemöve und e paar Wisskopfadler gseh. Plötzlich het dr Björn e Bär gseh und mir hend sofort agahlte. 

Tatsächlich: 300m vo und entfernt isch e Grizzly-Mama mit zwei Baby-Grizzlies am Fjordufer entlang spaziert. Do sie so wiit weg gsi sind, hend mr uns usem Auto getraut und se mit em Feldstecher beobachtet. 

Nach öpe 10 Minute hets im Wald (uf dr Strossesitte, wo unsers Auti gstande isch) afo knacke und krache. D Nadja het als Witz zum Björn gseit: "Dass sind sicher d Bäre im Wald, i gang wieder ins Auti." Dr Björn het no chli gwartet, aber das Knacke isch immer lüüter worde und so isch au er zrugg ins Auto cho. Keini 10 Sekunde spöter, überquert doch tatsächlich e witteri Grizzly-Mama mit ihne zwei Babies nume 5 Meter vor unserem Auto d Stross! 

Am negste Morge sind mr extra früh ufgstande und hend nomol - oder wieder - e Grizzly-Mama mit ihne zwei Chliine dörfe beobachte! E unvergesslichs Erlebnis, die grosse Tier in freier Natur dörfe z beobachte.