Bolivie: hoch, bunt & arm
E Land, wo uns fasziniert & wo so viel z biete het. Aber Bilder sage meh als Wort: 
16. März - 8. April 2ol6

Mit em Jeep durch d Wüsti


In unsers Bolivie-Abentüür sind mit mit ere dreitägige Jeep-Tour durch die wunderschöni Landschaft gstartet. Los gange isch es in San Pedro de Atacarma (Chile) wo d Grenzformalitäte erledigt worde sind und denn isch es zu verschiedene Lagune gange, mit hend tuusigi vo Flamingos und hunderti vo Lamas bestuunt, Geysir uf 4'900 Meter über Meer bim Blubbere zue gluegt, ime Salzhotel übernachtet und am letzte Tag no d Salar de Uyuni (Salzwüesti) überfahre und e paar witzigi Fötteli gmacht! 

Laguna Verde


Geysir


Laguna Colorada


Arbol de Piedra


Laguna Canapa


Isla del Pescado


Salar de Uyuni

Do isch no unsers Sieges-Fötteli: mir hend nämli uf dr Facebook-Sitte vo "I love my Kanken" (Kanken= e Rucksack vo dr schwedische Marke Fjällräven, vo d Nadja au bim Reise drbi het) bime Wettbewerb mitgmacht und tatsächlich e neue Fjällräven Kanken gwunne! 

Potosi



Nach fast 8 Mönet het dr Björn denn au die ersti Läbensmittelvergiftig (wahrschinli wäge me Empanada vom Märt) und au dr Nadja gohts nit prächtig.. Aber das ghört glaub zu Bolivie drzue. E Dreigang-Menü gits für CHF 3.50 - was super wär.. Wenn me drnoch nit Medikament für CHF 10.- miesst kaufe (nach 100 Täg in Südamerika liegt d Nadja s erstmol mit ere Maageverstimmig und Fieber im Bett).
Drfür vertrage mr d Höchi unglaublich guet & hend keini Azeiche vo Höhekrankheit! 

Sucre


In Bolivie wird am 23. März (und zwei Täg vorher und zwei Täg drnoch) dr "Dia del Mar", also dr Meerestag, gfyyrt: Im Krieg vo 1879-1884 het Bolivie grossi Landesfläche - und somit au drMeereszuegang - an Chile verloore. Dä wänd sie gern zrugg & darum wird gfyyrt: mit Marschmusik, Umzüüg und allem, was drzue ghört!

Tarabuco


Jede Sunntig findet in Tarabuco e grosse Buuremärt statt. Mir hend denn grad dä Sunntig im März breicht, wo zuesätzlich au no s jöhrliche "Pujllay" gfyyrt wird: s grösste iiheimische Fest, wo dr Sieg gege s spanische Kolonialherr fyrt. 

Coroico


Do isch uns mol wieder bewusst worde, wie schwierig s Vorusplane in Südamerika isch. Luut Reiseführer isch Coroico e super Usgangspunkt für Trekking-, Mountainbike- und Riittoure. Nach dr zweistündigeMinibus-Fahrt vo La Paz hend mr uns informiert und gmerkt, dass weg dr Nebesaison und Ostere kei einzigi Tour in de negste Paar Täg statt findet..

La Paz


Für was brucht me Autogarage, wenn me d Reperature au direkt am Strosserand cha mache?!
Für was brucht me Autogarage, wenn me d Reperature au direkt am Strosserand cha mache?!

Huayna Potosi


Am Ostersunntig isch unsers grosse Abentüür los gange. Mim Auti simmer uf 4'800 Meter gfahre worde. Am Nomitag simmer mit de Stiigiise chli ufeme Gletscher umegloffe und hend chönne e 10 Meter hochi,fast senkrechti Wand erklätteret.
Am 2. Tag simmer 400 Höhemeter witter ufe zu dr zweite Berghütte gloffe. Dr Nomitag hend mr zum Entspanne, Läse & Schach spiele gnutzt. Und ganz wichtig: viel Coca-Tee gege d Höhekrankheit! (Domir scho sit zwei Wuche uf 3'000-4'900 Meter sind, ischs für uns chum e Problem gsi, dr Cocatee het trotzdem gschmeckt) Schlof isch weg eme Sturm leider nit viel dinne gläge.. 
Nach nur 3 Stund Schloof isch denn um Mitternacht bereits Tagwach gsi. Nachem Zmorge ischs am 1:15 Uhr uf 5150 Meter über Meer bi Sterne-&Mondschiin los gange. 
Nach 5 Stunde mit unendlich viele chliine Pause zum Kraft sammle simmer denn am 6:15 Uhr pünktlich zum Sunneufgang bim Gipfelkamm uf 6088 Meter über Meer acho! 

Es isch e unglaublichs Gfühl gsi! D Nadja het vor Freud und Erschöpfig nur no brielt und dr Björn het das mit eme bsundere Gschänkli nur no verstärkt:
Und NEI, es isch kei Verlobigsring! Eifach e Belohnig, dass sie mitcho isch und s gschafft het.

Nachem 2stündige Abstieg zur Berghütte simmer zerst mol hundemüed gsi und hend mit eme Power-Nap nomol Kräft mobilisiert, zum no zu dr untere Berghütte z marschiere, vo wo us mr denn mit em Auto wieder nach La Paz gfahre worde sind. 
Es isch e super Erfahrig gsi - mir sind super zfriede gsi mit unserem Guide und de Agentur "Climbing South America"-  unsers absolute Highlight bis jetzt!  

Death Road


S 1. Mol in fast 8 Mönet verbringe mr e Tag getrennt: Dr Björn wagt soch nämli an d Todesstross! 

Titicaca-See


Isla del Sol

Copacabana


Für dr Nadja ihre Geburtstag gönne mr uns zwei Nächt im Schildchrot-Huus im Las Olas am Titicacasee - Es isch traumhaft! 

Exkurs: (Nacht)Bus-Fahrten in Südamerika


Bi Nachtbusfahrte treffe mindestens 6 vo de 8 unte gnennte Pünkt zue:

* S het mindestens 1 Passagier, wo schnarcht
* S het mindestens ei Baby/Chliichind und zu 95% vo de Fäll sitzts genau nebe/hinter uns
* S het entweder 33 Grad oder 16 Grad. Im Glücksfall wächslet sichs no im Stundetakt vo schwitzig heiss zu schlotterend kalt ab! 
* Bi de Hälfti vo de Fahrgäst liegt die letzti Duschi z lang zrugg
* Wenn me Glück het, werde meh Passagier ihglade, wie dass es Plätz het, so dass denn alkoholisierti Lüt im Gang pfuuse
* Es lauft in einere Luutstärki e brutale Drogefilm & wenn er fertig isch, foht er grad nomol vo vorne a!
* S cha guet sii, dass d Büs au mitte indr Nacht all zwei Stund halte (und s Liecht aschalte). Schön isch denn vorallem, wenn me durch ängi Allee fahrt und d Äst vo de Bäum an d Fenster knalle. 
* dr Fahrer loost die ganz Nacht 90er-Party-Songs - und das soooo lut, dass mes au z Hinterst im Bus guet ghört

Aber mir wänd uns nit beklage - Nachtbüs sind günstig, me spaart e Hostelübernachtig, me chunnt guet vorwärts und e paar Stund Schloof liegt trotzdem dinne! S Busfahre ghört für uns mittlerwiile so zum Reise drzue, dass mr uf Fahrte, wo weniger wie 2 Stund gönd, nit emol s EBook usenähme. 



Danke für all die Geburtstags-Wünsch. S bolivianische Internet isch richtig überforderet gsi & fast zämäbroche. 

Mir fyyre aber nit nur dr Nadja ihre Geburtstag, sondern au dr letzt Tag in Bolivie & unseri Halbzyyt (mir wüsse immer noni genau, wenns zrugg ind Schwyyz goht, aber dr Tag 250 isch e guete Tag, zum unseri Halbzyyt z fyyre - bis zur Wiehnacht sinds nämli no 260 Täg - S git übrigens e App , wo das zellt. I verbring sicher nit mi Geburtstag drmit, Kalendertäg z zelle.. ) //  immer no (wieder) gsund, fit, glücklich und jede Tag am gniesse! 
Danke, dass dir mit uns mit reised! 
N&B